skip to Main Content

LAS MESIRAS D'INTEGRAZIUN PROFESSIUNALAS

Haveis Vus piars igl equiliber pervia da midadas en Vossa situaziun da veta? Saveis Vus buca pli exequir la professiun tscharnida oriundamein? Sforza Vossa sanadad d’anflar novas perspectivas professiunalas?

En stretga collaboraziun cun Vus e l’AI analisein nus la situaziun, registrein las restricziuns ed evaluein il potenzial da svilup.

Cun differentas mesiras d’integraziun sco trenar la habilitad da supportar squetsch, far in trenament da basa, in trenament da lavur ni cun porscher lavur per surmuntar il temps accumpignein nus Vus sin la via anavos el mintgadi da lavur. La finamira ei da puspei fitgar pei ella fiera da lavur.

Dapli informaziuns davart las mesiras d’integraziun professiunalas survegnis Vus dil menader dil sectur giuvenils, economia.

LA LAVUR SOCIALA DA SCOLA

Sfidas socialas, pedagogicas ed educativas fruntan en scola ina sin l’autra e daventan cumplexas.
Cun nossa purschida da lavur sociala da scola sustenin e discarghein nus scolas ordeifer la Casa Depuoz.

Scolar/a: Sesentas buca bein? Occupescha tei enzatgei?
Geniturs: Ei miu affon semidaus en ina moda nunusitada?
Persuna d’instrucziun: Dat ei giuvenils che jeu capeschel buca pli? Exista ella classa ina dinamica nunusitada?

Nossas specialistas e nos specialists stattan a disposiziun en cass da talas ni semegliontas situaziuns e teidlan bugen tier a Vus.

En cussegliaziuns independentas erueschan els ensemen cun Vus las sfidas e skizzeschan sligiaziuns.
Ulteriuras purschidas tematicas sco il cumportament en situaziuns da crisa, projects cun gruppas e classas realiseschan els en stretga collaboraziun cun la scola.

El center stattan adina damondas socialas, pedagogicas ed educativas cun il context «scola». Bugen accumpignein nus nossas scolas partenarias sin quella via e creein ensemen cun ellas ina reit da contact cun auters posts specialisai.

Dapli informaziuns davart la lavur sociala da scola survegnis Vus dil menader dil post specialisau AGF per damondas socialas.

IGL ACCUMPIGNAMENT DA FAMIGLIAS SOCIALPEDAGOGIC

Geniturs vegnan adina puspei confruntai cun novas sfidas. Seigi quei singularitads da cumportament d’in affon, problems en scola, conflicts da generaziuns ni auters obstachels ch’els ston surmuntar. Nies team dispona da gronda experientscha e sustegn famiglias per anflar la via anavos en in mintgadi reglau.

Encuri il discuors cun nus. Nus gidein Vus a scuvierer, reflectar ed amplificar las cumpetenzas existentas per rinforzar Vossa rolla sco geniturs ni responsabels per l’educaziun.

Dapli informaziuns davart igl accumpignament da famiglias socialpedagogic survegnis Vus dil menader dil post specialisau AGF per damondas socialas.

ULTERIURAS PURSCHIDAS SOCIALAS

Grazia allas vastas reits da contact cun divers posts specialisai sco l’Autoritad per la protecziun digl affon e da carschi, la curatella professiunala ni il survetsch social regiunal seresultan ulteriuras purschidas: dis da viseta accumpignai, plazzaments d’urgenza e timeouts. Quellas realisein nus individualmein a basa dalla situaziun respectiva.

Contactei nus. Nus tractein Vossa damonda a moda confidenziala e sustenin Vus en Vossa situaziun da veta actuala.

Dapli informaziuns davart ulteriuras purschidas socialas survegnis Vus dil menader dall’instituziun.

FUGITIVS MINORENS BUC ACCUMPIGNAI

Nus vivin en in mund globalisau e vegnin aschia confruntai cun novs temas. Biars carstgauns ston bandunar lur patria. Affons e giuvenils vegnan separai da lur geniturs. Egl Albertushof a Glion habitescha in bien tozzel giuvenils denter 16 e 25 onns.

Nies team d’accumpignament ei cheu per els da di e da notg. El gidan ils giuvenils a s’orientar en nossa tiara ed en nossa cultura.

Ils affons e giuvenils frequentan la scola cun la finamira da far ina scolaziun per saver viver suenter a moda independenta tier nus. Sin lur via absolvan els differents scalems da habitar, nua che nus pretendein dad els adina dapli responsabladad. Nus accumpignein els sin questa via en ina patria aunc nova a moda adattada a lur basegns.

Dapli informaziuns davart la purschida per fugitivs minorens buc accumpignai survegnis Vus dil menader dall’instituziun.

MIRAR ANAVON

COMMUNABLAMEIN

Seigi quei en cass da problems en scola, difficultads sin via anavos el mund da lavur ni conflicts en famiglia – nus essan cheu per Vus. Contactei nus, communablamein mirein nus anavon ed anflein la dretga sligiaziun.

Back To Top