HABITAR
«Esser a casa» vul dir per nus: sviluppar confidonza, passentar muments cumpleni, sesentir bein, vegnir prius serius, sesentir dumandaus, esser integraus en ina cuminonza familiara e saver sesviluppar en sia individualitad.
En nossas tschun habitaziuns vivan carschi cun restricziuns. Mintgina da nossas sis combras ei endrizzada a moda persunala, per che nos cussadents sesentien da casa.
Mintga gruppa entscheiva il di tenor ses basegns. Igl emprem dat ei in solver che vegn preparaus ella cuschina da habitar. Rinforzai sededicheschan silsuenter tuts allas differentas activitads tochen la pausa da miezdi. Suenter il program da suentermiezdi gudin nus ella gruppa il temps tochen la tscheina, seigi quei ell’atgna combra, en stiva ni ensemen davos meisa. En stiva schein nus repassar il di pacificamein – pertgei damaun spetga nus in niev di.
L'OCCUPAZIUN
En nos dus luvratoris «Stavons» e «Curtin» san nos clients s’engaschar tenor lur habilitads. Cun sustegn ed agid da nies team d’assistentas e d’assistents lavuran els vi da differents projects. Ferton che las activitads ella gruppa «Stavons» han liug surtut endadens, luvrein nus cun la gruppa «Curtin» savens giuado.
Cun dar lavur – seigi quei en iert, cun emplunar lenna ni zambergiar cun arschella, lenn ed autras materialias – possibilitein nus da far experientschas da success, creein satisfacziun e stema, gidein a surmuntar difficultads ed ad emprender dad ir entuorn cun terradas.
El contact cun ils animals ni cun ir a cavagl survegnan nossas cussadentas e nos cussadents in sentiment da vischinonza ed in lev sentiment da libertad. Cun tgirar mintga di nos cunegls sviluppeschan els in senn da responsabladad.
Ir el curtin dils senns a pei blut sur differentas materialias, sentir la natira, palpar objects, seschar ballantschar vi e neu, guder sentupadas – quei ei ina buna caschun da sentir tut ils senns.
HABITADI CASA SOLDANELLA
La Casa Soldanella, in baghetg emperneivel e marcant che sesanfla directamein alla via principala a Rueras, porscha in dacasa a 12 persunas carschidas cun restricziuns. Ils cussadents schezegian igl ambient professiunal e familiar e gaudan il mintgadi en quella rama tut speziala. Els auden semplamein ensemen.
Duront l’jamna ein els occupai cun differentas lavurs e vegnan promovi individual. El center stat igl engaschi tenor habilitads singularas e buca la productivitad. Ord tut quellas lavurs ei sesvilupau ina stizunetta nua ch’ ins sa cumprar cartas, candeilas, monas d’envidar fiug e bia auter. Quella purschida sesanfla en la casa da scola a Rueras, in pèr minutas a pei naven dalla Casa Soldanella.
Leu vegnan tut quellas caussas per la stizun producidas. La via alla lavur ei per ils clients mintga di ina nova sfida e dat ad els ina ulteriura pusseivladad da far experientschas, surmuntar difficultas ni guder in cert sentiment da libertad.
Digl onn 1992 entochen igl onn 2020 ei la casa Soldanella stada in dacasa independent en la Val Tujetsch per persunas cun in impediment. Dapi 2021 astgein nus dalla Casa Depuoz menar quella casa singulara e possibilitar il habitar, viver e luvrar en in liug spezial.
La stizunetta (ella casa da scola a Rueras) ei mintgamai aviarta duront l’jamna dallas 14.00 – 16.30.
IGL ACCUMPIGNAMENT DA HABITAR
Viver ell’atgna habitaziun – quei secapescha buca da sez per tut ils carstgauns. Nus accumpignein nos clients individualmein el mintgadi e coordinein ils cuntegns digl accumpignament cun lur basegns. Surprender puspei responsabladad plein curascha, haver fidonza en sesez, prender il tgamun enta maun; nus gidein a dumignar il mintgadi ellas atgnas quater preits.
IGL ACCUMPIGNAMENT DA LAVUR
Sin fundament da restricziuns da sanadad drovan entgins da nus in accumpignament el mund da lavur. Ensemen cun il patrun anflein nus vias, instruments e sligiaziuns per dumignar la lavur e sentir satisfacziun.
