Il mintgadi ellas famiglias ed ella scola vegn adina dapli cumplexs ed ei savens ina sfida, ei dat problems e difficultads. Sligiaziuns el liug ein aschia dapli da basegns. Dapi 2015 menein nus in post specialisaus correspundent «cussegliaziun ed accumpignament cun la finamira d’ina purschida conform als basegns el spazi ambulant.

Oz ei il post specialisau secompruvaus e survegn da differentas varts ses pensums (scolas, famiglias, autoritad per la protecziun d’affons e carschi APAC, la curatella). Nus sespruvein da realisar ensemen  cun Vus vos basegns e dad elaborar cun Vus sligiaziuns correspundentas.

Ella scola dat ei dabia midadas e la cumplexitad ei carschida fetg ils davos onns. Affons e giuvenils portan lur cargas ch’ein independentas dalla scola el spazi dalla scola. Quellas drovan sligiaziuns, mo las scolastas ed ils scolasts han ord motivs dil temps e dil fatg buc la pusseivladad da porscher lezzas.

La Casa Depuoz porscha dapi 2015 lavur sociala da scola en differentas vischnauncas el cantun  Grischun. Ina persuna dil fatg (lavur sociala, pedagogica sociala, psichologia) vegn pladida da nus per Vossa scola. Ella ei responsabla per la purschida dalla lavur sociala da scola en Vossa scola. Las incumbensas principalas dalla lavur sociala da scola ein la cussegliaziun, stender reits, prevenziun e l’intermediaziun ad auters posts specialisai.

• La Casa Depuoz ei politicamein e confessiunalmein neutrala.
• El mument (2024) lavuran 10 persunas dil fatg en differentas scolas el cantun Grischun per nies post specialisaus. La savida en quei team ei gronda e stat a disposiziun era a Vossa scola.
• Nus havein regularmein sesidas da team cun discussiuns da cass e cun coachings individuals cun tut ils commembers dil team.
• Nus collavurein stretg cun persunas relevantas dalla scola e dil contuorn privat.
• Nus purschin in coaching cumpetent per scolastas e scolasts sche la dinamica en classa ei pretensiusa.
• La lavur sociala da scola ha siu focus sin ina diagnosa e in’intervenziun sperta.
• La lavur sociala organisescha occurrenzas preventivas ed exequescha quellas ensemen culla scola.
• La lavur sociala da scola contribuescha sia part per ina buna cultura ella casa da scola, aschia che la scola gudogna attractividad.
• Nus evaluein nossa lavur constantamein. Ina ga ad onn survegn la scola in rapport da lavur ed ina statistica dalla lavur prestada.

Vus vuleis introducir lavur sociala da scola? Dapli informaziuns survegnis Vus dil menader dil sectur cussegliaziun ed accumpignament.

L‘introducziun dalla lavur sociala da scola succeda en plirs pass. Suenter in emprem contact da Vossa vart presentein nus la lavur sociala da scola al meinascola ed al cussegl da scola pli detagladamein, ed ei dat in sclariment da basegns. Ils proxims pass suondan risguardond la situaziun individuala e vegn planisada culla scola. Quei process d’introducziun cuozza circa in onn.

Geniturs vegnan adina puspei confruntai cun novas sfidas. Seigi quei sigularitads da cumportament d’in affon, problems en scola, conflicts da  generaziuns ni auters obstachels ch’els ston surmuntar. Nies team dispona da gronda experientscha e sustegn da famiglias per anflar la via anavos en in mintgadi reglau.

Ensemen cun Vus encurin nus sligiaziuns per ils problems descrets da Vus. Nus formulein cun Vus las finamiras che Vus lessas dumignar ed evaluein ellas cun Vus suenter temps defini.

Ei dat duas variantas per l’installaziun d’in accumpignament da famiglias socialpedagogic :

Voluntarmein: Vus stueis s’annunziar tier l’autoritad per la protecziun d’affons e carschi APAC cun in formular correspundent e cun in’offerta da nus. Schel l’APAC accepta Vossa damonda, survegnis Vus in scriver dad els che Vus saveis inoltrar a Vossa vischnaunca da domicil per surprender cuosts. Ei dat ina part dils cuosts  che Vus geniturs veis da pagar, l’altezia da quella summa stueis Vus discussiunar culla vischnaunca.

Disponiu: Vus essas gia el contac culla APAC ni culla curatella. La mesira ei la medema sco sisum cull’exczepziun dils cuosts. Il quen vegn direct dalla curatella tarmess alla vischnaunca da domicil.

Haveis Vus damondas? Encuri il discuors cun nus. Nus gidein Vus a scuvierer, reflectar ed ampflicar las cumpetenzas extistentas per rinforzar Vossa rolla sco geniturs ni responsabels per l’educaziun.

Dapli informaziuns davart igl accumpignament da famiglias socialpedagogic survegnis Vus dil menader dil sectur cussegliaziun ed accumpignament.

Quella purschida ei per geniturs ch’astgan buca visitar lur affons senza accumpignament. Las raschuns da quella mesira ein savens sentenzias giuridicas ni decrets dalla APAC. Nus possibilitein quellas sentupadas en ina rama segira ed adadatta als affons ed accumpignein las visetas cun ina ni duas persunas dil fatg. Omisdus geniturs ein el liug, denton en differentas stanzas.

Dapi 2021 posseda la Casa Depuoz la lubientscha sco «organisaziun da plazzament da famiglias». Quella lubientscha possibilitescha nus da recrutar famiglias da tgira, d’alloschar  affons e giuvenils en quellas famiglias e da garantir in bien accumpignament.

Per famiglias da tgira: Essas Vus interessai da prender in affon sco famiglia da tgira? Dapli informaziuns saveis Vus retrer da nies concept ni s’annunziai via il link tier nus.