skip to Main Content

LAS SCOLAZIUNS

La Casa Depuoz dat ina perspectiva era als giuvenils che drovan empau dapli accumpignament per far il pass ella veta professiunala. Suenter il temps da scola obligatori purschin nus als giuvenils differentas plazzas d’emprendissadi che vegnan sustenidas dall’Assicuranza federala d’invaliditad (AI).

Parallelamein cun la scolaziun pratica en nies menaschi frequentan ils giuvenils la scola pratica professiunala a Rothenbrunnen ni la scola professiunala artisanala a Cuera ed han la pusseivladad d’approfundar lur savida en ateliers d’emprender facultativs ella Casa Depuoz.

Scolaziun pratica professiunala (SPP)

Per giuvenils che han lur fermezias surtut ella pratica e san buc ademplir las pretensiuns d’ina scolaziun d’attest dat ei la pusseivladad d’absolver ina formaziun da basa professiunala da 2 onns. En quella adattein nus il program allas habilitads individualas dils giuvenils cun metter igl accent sin las activitads praticas d’ina professiun. L’examinaziun dalla qualificaziun professiunala vegn fatga dalla cussegliaziun professiunala dall’AI.

Las scolaziuns offeridas:

  • collaboratur/a da cuschina SPP
  • collaboratur/a d’economia da casa SPP
  • collaboratur/a da pedel SPP

Dapli informaziuns davart las scolaziuns survegnis Vus dil menader dil sectur giuvenils, economia.

Attest federal professiunal (AFP)

La scolaziun professiunala da dus onns ei ord vesta dalla scola e dalla professiun pli pretensiusa e sedrezza tenor las directivas dallas federaziuns professiunalas. Las pusseivladads da scolaziun cumpeglian ils secturs cuschina, economia da casa e manteniment.

Las plazzas d’emprendissadi offeridas:

emploiau/-ada da cuschina AFP
practicist/a d’economia da casa AFP
practicist/a da manteniment AFP

Haveis Vus interess? Nus selegrein d’udir da Vus.

Attest federal da qualificaziun (AFQ)

La scolaziun professiunala da treis onns ei la pli pretensiusa ord vesta dalla scola e dalla professiun. Las federaziuns professiunalas prescrivan ils cuntegns da scolaziun dils secturs economia da casa, manteniment e cuschina.

Las plazzas d’emprendissadi offeridas:

specialist/a d’economia da casa AFQ
specialist/a da manteniment AFQ
cuschinier/cuschinunz AFQ

Practicum

Ei in emprendissadi tier nus la dretga opziun? A quella damonda eis ei buc adina sempel da rispunder. Bugen arranschein nus in praticum d’evaluaziun per eruir tgei scolaziun ch’ei adattada il meglier per Vossa feglia ni Vies fegl.
Tenor pusseivladad absolvan ils emprendists duront lur scolaziun differents praticums ell’economia libra. Quels duein dar in’envesta approfundada e levgiar il pass ella veta professiunala. Bugen gidein nus a realisar quella schanza.

Job Coaching

Il pass digl emprendissadi terminau ella veta professiunala ei per ils giuvenils ina sfida. Ei stat a nus a cor da sustener els duront quei temps. En stretga collaboraziun cun il patrun accumpignein nus ils giuvens carschi tenor pusseivladad duront in temps limitau en quei process. Aschia vulein nus garantir in’integraziun professiunala e sociala durabla.

HABITAR

Nos giuvenils en scolaziun habiteschan duront l’jamna en nossa «Casa Prisma» el vitg, endrizzada a moda moderna.

Surprender responsabladad en situaziuns da habitar quotidianas – quei rinforzescha ils giuvenils e gida els a dumignar las sfidas dalla scolaziun. La convivenza en ina gruppa dat ad els confidonza e segirezia d’anflar lur plaz futur el mund da lavur ed en nossa societad.

Cun nies model da scalems possibilitein nus als giuvenils da far ils pass d’in accumpignament stretg tochen al habitar a moda autonoma en ina habitaziun externa.

FIXEI CUN NUS

FINAMIRAS COMMUNABLAS

Bugen cussegliein nus Vus persunalmein ed encurin ina sligiaziun adattada per il svilup individual. Per dapli informaziuns ni per fixar in termin contactei per plascher il menader dil sectur giuvenils, economia.

Back To Top