La Casa Depuoz dat ina perspectiva era als giuvenils che drovan empau dapli accumpignament per far il pass ella veta  professiunala. Suenter il temps da scola obligatoric purschin nus als giuvenils differentas plazzas d’emprendissadi che vegnan sustenidas dall’Assicuranza federala d’invaliditad (AI).

Parallel cun la scolaziun pratica en nies menaschi frequentan ils giuvenils la scola pratica professiunala a Cuera ni la scola professiunala a Cuera ed han la pusseivladad d’approfundar lur savida en ateliers facultativs ella Casa Depuoz.

Nus accumpignein era giuvenilas che fan lur scolaziun tier in patrun extern.

En collavuraziun cull‘AI san giuvenils sepreparar ella Casa Depuoz precisamein ad ina scolaziun interna ni externa. Las «mesiras preparativas en rama dalla cussegliaziun professiunala» possibiliteschan als giuvenils investas en differents camps da professiun. Ei la decisiun per ina scolaziun prida, san ils giuvenils sepreparar el camp correspundent cun la mesira «preparaziun precisa per ina scolaziun professiunala primara». La finamira dallas «mesiras d’integraziun per giuvenils» ei da menar giuvenils ch’ein stai pli ditg naven da lur plazzas da lavur puspei el mintgadi da lavur.

Per giuvenils che han lur fermezias surtut ella practica e san buc ademplir las pretensiuns d’ina scolaziun d’attest dat ei la pusseivladad d’absolver ina formaziun da basa professiunala da dus onns. En quella adattein nus il program allas habilitads individualas dils giuvenils cun metter igl accent sin las activitads practicas d’ina professiun. L’examinaziun dalla qualificaziun professiunala vegn fatga dalla cussegliaziun professiunala dall’AI.

Las scolaziuns offeridas :

• collaburatur/a da cuschina SPP
• collaburatur/a d’economia da casa SPP
• collaburatur/a da pedel SPP

scolaziun SPP

La scolaziun professiunala da dus onns ei ord vesta dalla scola e dalla professiun pli pretensiusa e sedrezza tenor las directivas dallas federaziuns professiunalas. Las pusseivladads da scolaziuns cumpeglian ils secturs cuschina, economia da casa e manteniment.

Las plazzas d’emprendissadi offeridas :

• emploiau/ada da cuschina AFP
• practicist/a d’economia da casa AFP
• practicist/a da manteniment AFP

La scolaziun professiunala da treis onns ei la pli pretensiusa ord vesta dalla scola e dalla professiun. Las federaziuns professiunalas prescrivan ils cuntegns da scolaziun dils secturs economia da casa, manteniment e cuschina.

Las plazzas d’emprendissadi offeridas :

• specialist/a d’economia da casa AFQ
• specialist/a da manteniment AFQ
• cuschinier/a AFQ

Per emprender d’enconuscher igl emprem la veta professiunala sa Vossa feglia ni Vies fegl absolver ina ni pliras jamnas da fuffergnadi. Nus savein dar envesta ad els en lavurs da cuschina, da tenercasa, da manteniment da casa (pedel), d’accumpignament d’affons e da carschi ni en lavurs da biro. Ei dat ulteriurs sclariments per definir il scalem realistic dalla scolaziun. Sch’il viadi pils fuffergnaders ei memia liungs san els era habitar duront quellas jamnas ella gruppa d’habitar interna.

Ei in emprendissadi tier nus la dretga opziun? A quella damonda eis ei buc adina sempel da rispunder. Bugen arranschein nus in praticum d’evaluaziun per eruir tgei scolaziun ch’ei adattada il meglier per Vossa feglia ni Vies fegl. Sch’ei dat cheu tier nus buca ina risposta cuntenteivla, savein nus era organisar praticums ell’economia libra. En cass d’in emprendissadi leu accumpignein e sustenin nus Vossa feglia ni Vies fegl duront igl entir temps da scolaziun el menaschi ed egl emprender per la scola. Igl ei medemamein pusseivel d’habitar silla gruppa interna.

Duront la scolaziun interna absolvan las emprendistas ed ils emprendists tenor pusseivladad praticums ell’economia libra. Quels duein dar in’envesta approfundada ed ils giuvenils emprendan d’enconuscher autras structuras da luvrar. Quei duess levgiar ad els il pass ella veta professiunala e menar els ad ina sligiaziun realistica suenter igl emprendissadi.

Il pass digl emprendissadi terminau ella veta professiunala ei per ils giuvenils ina sfida. Ei stat a nus a cor da sustener els duront quei temps. En stretga collaboraziun cun il patrun accumpignein

Nos giuvenils en scolaziun habiteschan duront l’jamna en nossa « Casa Prisma » el vitg, endrizzada a moda moderna.

Surprender responsabladad en situaziuns da habitar quotidianas – quei rinforzescha ils giuvenils e gida els a dumignar las  sfidas dalla scolaziun. La convivenza en ina gruppa dat ad els confidonza e segirezia d’anflar lur plaz futur el mund da lavur ed en nossa sociatad.

Cun nies model da scalems possibilitein nus als giuvenils da far ils pass d’in accumpignament stretg tochen al habitar a moda autonoma en ina habitaziun externa.

Quella purschida d’habitar sedrezza era a giuvenils che fan in emprendissadi en in menaschi extern, che drovan denton sustegn en damondas da habitar.